Министерот за локална самоуправа Сухејл Фазлиу оствари средба со градоначалникот на град Скопје Петре Шилегов. На состанокот се разговараше за функционалноста на градот Скопје и споделувањето на надлежностите со десетте скопски општини, во рамките на Законот за градот Скопје.

Министерот за локална самоуправа Сухејл Фазлиу истакна дека надлежно за имплементацијата на Законот за градот Скопје е Министерството за локална самоуправа и во тој контекст Министерството е заинтересирано заедно со градот Скопје да отвори дијалог за подобрување на нормативната рамка од аспект на поефикасно спроведување на надлежностите.

-Ефикасноста е важна во испораката на услугите и во решавањето на проблемите и во таа смисла наша задача е да  бараме решенија  за подобрување на системот, рече министерот Фазлиу.

Градоначалникот на град Скопје Петре Шилегов изрази задоволство од покажаниот интерес за соработка на Министерството за локална самоуправа со градот Скопје и изрази подготвеност да се отпочне со дијалог на техничко ниво.

-Ова е време на отворени општини и градови и целта е градот Скопје да се организира и да функционира како отворен град, рече градоначалникот Шилегов.

Министерот за локална самоуправа Сухејл Фазлиу и градоначалникот на Скопје и претседател на ЗЕЛС, Петре Шилегов разговараа и за прашања кои што се од интерес за сите општини, пред се финансиската стабилност на општините, решавање на проблемите со наследените долгови и начините за системско решавање на прашањата, со цел да се обезбеди непречено вршење на функциите во обезбедувањето на услугите за граѓаните.